• Mohamed Elgml

كنا فين؟؟؟ - اتوم ثرى دى

Updated: May 31


اللى يعرفنا من زمان ومتابعنا من اول ما بدأنا فى 2015/2014 عارف اننا كنا عاملين شغل حلو اوى فى الفترة دى وساعدنا ولو بجزء بسيط فى نشر تكنولوجيا كانت تعتبر لسه جديدة فى الوقت ده. واللى مايعرفناش خلينى احكيلك قصتنا سريعا كدا.

احنا مجموعة شباب بدأنا كشركة مهتمة بتكنولوجيا التصنيع الرقمي والصناعة ثلاثية الابعاد بامكانيات وخبرة قليلة جدا. ومع بداية 2015 قمنا بنشر أول مشروع مفتوح المصدر لطابعة ثلاثية الأبعاد فى مصر والوطن العربى عشان نبدأ نعرف الناس بالتكنولوجيا الجديدة وأهميتها وأهمية استخدامها. الحمد لله المشروع قدر يلفت النظر ليه وقتها وناس كتير بدأت تهتم ببناء ماكيناتها الخاصة.



اول لقاء لنا في فاب لاب مصر سنة 2015

صورة من نادى العلوم جامعة الاسكندرية صيف 2014

مؤسس مجلة Make magazine

بعدها بفترة بدأنا نبيع المنتج الخاص بينا عبارة عن KIT فيها جميع المكونات المطلوبة لتجميع وتشغيل الصانعة ثلاثية الابعاد وبيقوم المشتري بتجميعها بنفسه عشان يبدأ يعرف المكن ده بيتكون من ايه و بيشتغل ازاى. و قدرنا وقتها نوصلها للسوق بسعر قليل جدا عشان تكون متاحة لشريحة أوسع خاصة واننا كنا بنستهدف الطلبة والهواة بشكل أساسى فى الفترة دى.



مكونات اتوم ديسكتوب كيت

مجموعة من طلبة ستيم خلال تجميع الطابعة الخاصة بمشروعهم المدرسى



وعلى مدار سنتين اشتغلنا فيهم قدرنا نوصل لعدد كبير جدا من العملاء وقدرنا نزّود وندّخل خدمات وموديلات جديدة كلها تصميم وتصنيع مصرى وبدأ المشروع فى التوسع وزيادة فى الطلب لدرجة اننا كنا بدأنّا فى آخر فترة فى 2016 نشحن مكنتين او تلاتة فى الاسبوع فى فترة كانت التجّار الكبيرة بتتعب عشان تسوّق مكنة واحدة.


تجميع 4 ماكينات خلال تحضير طلبات عروض الجمعة السوداء 2015



ولكن دائما

تأتى الرياح بما لا تشتهي السفن

المشوار كان صعب والطريق مش دايما سالك. وانك تفكر تصنع منتج وتقدمه للناس لاول مرة فى حياتك وبدون سابق خبرة ده شئ مش سهل خالص, مابالك بقى وانت بتحاول تصنع منتج وتأسس وتدير شركة وكل ده بخبرة قليلة جدا وبموارد مالية وبشرية تكاد تكون معدومة. كان طبيعى انك ترشق فى حيطة, الحقيقة احنا ما رشقناش فى حيطة واحدة احنا رشقنا فى سلسلة حوائط متتالية. من اول قلة الخبرة واسلوب التخمين فى كيف تدار الأمور, الى قلة المعلومات والاجابات على اسئلة وحلول لمشاكل بتقابلك, الى صعوبة البحث على التمويل والفشل بعد محاولات كتيرة انك تجيب فلوس, ده غير النصب والاشتغالات فى مرحلة التمويل دى, الى فريق العمل اللى طبعا اجهد وماتحملش كل الضغوط دى وقرر يشوف مصلحته فى حتة تانية. حتى محاولة انك تبنى فريق تانى غير اللى اتهد او توظف حد موهوب معاك فى الفريق ده شئ محتاج انك تكون ساحر عشان تعرف تعمله او انك تكون بكفاءة نجيب ساويرس مثلا فى انه ازاى بيعرف يختار موظفيه.



كل اللى فات صعب لكن ممكن تستحمله وتعديه انما اللى كان دايما بيكسرنا ويحبطنا هى مشاكل متعلقة بالمنتج نفسه وهى انك كنت بتعمل منتج جامد جدا وانت عارف انه جامد جدا بس للاسف ماحدش بيعرف يستخدمه غيرك (اه والله زمبئولك كدا), ونسبة كبيرة من اللى بيشترى منك بيفشل فى استخدامه وده وضعنا في موقف صعب وقررنا على أثره اننا نوقف مبيعات فى اخر 2016 لحد مانفهم ايه اللى بيحصل, مع التحفظ على ان قرار التوقف كان قرار غلط جدا وقتها وكان ضرورى الاستمرار وتحسين المنتج فى نفس الوقت, لكن وقتها ماكنش ينفع يكون فى قرار غير ده وتحملنا المسئولية والنتيجة 3 سنين كاملة بدون مبيعات تذكر.

مشكلة صعوبة الاستخدام دى لم تكن مشكلة خاصة بينا لوحدنا إنما كانت ومازالت حتى الآن مشكلة عامة عند اى حد بيحاول يصنع نوع المكن ده فى مصر وبسببها ناس كتير اوى كويسة وقفت وناس تانية حصلها مشاكل كتير مع العملاء. ولكن الاهم, هل المشكلة هى مشكلة منتج سئ ولا مشكلة مستخدم غير متمرس ولا التكنولوجيا لسه جديدة ومش سهلة لأى حد يستخدمها ولا ولا ولا؟ الحقيقة وبعد بحث وتجربة لسنوات اقدر اقول المشكلة مزيج معقد من كل ما سبق ولكن للأسف من يتحمل المشكلة وحده هو انت كمصنع وليس المستخدم, وعلينا احنا كمصنعين اننا نفهم المشكلة ونقدم حلول ليها. انا مش هدعى واقول انى قدرت احل المشكلة دى فى اتوم ولكن اقدر اقول انى عرفت المشكلة فين وحاولت اضع لها طرق وحلول (approaches) عشان تخلى المنتج اسهل فى الاستخدام. طبعا مش هقدر اقول ايه هى الحلول دى عشان دى هتكون الميزة التنافسية لينا الفترة الجاية P: ,بهزر طبعا, ان شاء الله هحاول اعمل بوست تاني بيتكلم باستفاضة عن المشكلة دى وايه اللى جربت اعمله عشان اسهل الاستخدام وهل فعلا الحلول دى هتجيب نتيجة ولا لأ. وفى الاخر احب اوجه تحية لكل واحد لسه فاكرنا ووقف معانا فى بدايتنا واقول اهلا وسهلا لكل واحد لسه بيعرفنا النهاردة لأول مرة. وان شاء الله الفترة القادمة نقدر نخرج حاجة كويسة للسوق المصرى ونكون دايما قادرين على تحمل المسئولية امامكم...



  • Facebook
  • Twitter
  • Instagram
  • YouTube

ATOM3D,LLC. All site content, unless otherwise noted, is licensed under a Creative Commons 4.0 International license